martes, 18 de diciembre de 2012

Attendite, alumni Primi Cursus Baccalaureatus!

Na seguinte táboa podedes ver as notas do exame que fixemos hoxe á mañá, xunto coa nota definitiva do trimestre, unha vez computadas todas as notas parciais (lembrade: un 60% para o exame, un 25% para os exercicios -incluíndo os cuestionarios da Aula Virtual-, e un 15% para a actitude cara a materia). Os vosos nomes indícanse só coas iniciais, para preservar a vosa intimidade na rede. Mañá comentaremos todo na clase.

Attendite, alumnae Quarti Cursus!

Aquí vos deixo un cadriño coas vosas notas. Só poño a inicial do voso nome para preservar o máis posible a vosa intimidade. Notaredes certas diferencias entre a nota do exame e a final do trimestre (a que vai no boletín), pero iso aclararémolo na vindeira clase. De todos xeitos, é para estar satisfeitos: aprobades todas


viernes, 14 de diciembre de 2012

Attendite, alumni Secundi Cursi Baccalaureatus!

Ben, rapaces. Aquí tedes as notas do exame que fixestes esta mañá. Como sempre só emprego as vosas iniciais para preservar a vosa intimidade cara o público en xeral. Como vedes, non son moi boas nalgúns casos, e LEMBRADE QUE AÍNDA FALTA XENTE POR RESPOSTAR ÓS CUESTIONARIOS DA AULA VIRTUAL E QUE O PRAZO REMATA NA MADRUGADA DO DOMINGO 16 Ó LUNS 17. Non haberá prórroga do prazo porque, como xa sabedes, os cuestionarios levan abertos todo este trimestre. O luns amosareivos os exames.


sábado, 1 de diciembre de 2012

ROMANAE QVAESTIONES III (MMXII-MMXIII)

Rematou novembro, e xa houbo máis xente que aproveitou a ocasión: Nerea, Gemma e Sabela (4º ESO), e tamén María José (2º BAC) xa teñen 0,33 puntos máis para a súa nota final de trimestre. Para elas, e para todos os demais alumnos de Latín do IES Fontexería, aquí van as Romanae Quaestiones deste mes final do ano:


O primeiro día de decembro as nais romanas celebraban unha festa. Consistía en acudir a un templo na honra dunha deusa que fora construído, segundo di a lenda, en lembranza da intervención de dúas mulleres en defensa de Roma: a cidade atopábase en perigo polo ataque dun pobo estranxeiro, encabezado por un romano exiliado; este acontecemento tivera lugar no s. V a.C. De que deusa e templo falamos, e quen era ese romano que loitaba contra os seus concidadáns?




Outra festa relixiosa tiña lugar cada 15 de decembro, e nela honrábase a certo deus, protector dos cereais e dos seus lugares de almacenamento. Os protagonistas da celebración eran os animais que axudaban nos labores agrícolas, ós que se prohibía traballar, dedicándoos a outra actividade. De que deus estamos a falar e a que outra actividade dos animais nos referimos?






Un 18 de decembro de hai 1.898 anos foron xulgadas en Roma tres mulleres acusadas de ter cometido un gran sacrilexio. Dúas delas foron absoltas, pero unha foi atopada culpable e condeanada a ser soterrada viva. Como se chamaban e de que se lles acusou?

lunes, 19 de noviembre de 2012

Romani latine loquebantur (I)-Sub Prezi

Mentres aprendiamos a manexar a utilidade Prezi, deseñamos esta pequena presentación para o curso de Latín I (1º BAC), co fin de quedármonos con algunhas das palabras que os falantes do latín empregaban na súa vida diaria. Non é que agora se vaia falar latín, pero se cadra algún día son posibles as viaxes no tempo. Dunha conversa con Virxilio, por exemplo, canto coñecemento obteriamos!

viernes, 2 de noviembre de 2012

ROMANAE QUAESTIONES II (MMXII-MMXIII)

Xa rematou o mes de outubro, e só unha persoa respostou ás preguntas dese mes, obtendo así 0,33 puntos que se sumarán á nota final do trimestre: foi María José, de 2º BAC. Xa sabedes o que vos queda ós demais se queredes aproveitar esta oportunidade.

Estas son as Romanae Quaestiones do mes de novembro:

I. O día 4 deste mes, hai 2.057 anos, un gran orador romano pronunciaba un discurso en defensa de certo rei asiático (aínda que a súa procedencia era europea). O tal rei estaba acusado de ter apoiado ó bando perdedor en certa guerra, na que en realidade non fixera máis que manterse leal a un xeneral romano que sempre fora o seu benefactor. Busca os nomes do orador, do rei, e tamén do xeneral.



II. Durante tres días ó ano, en Roma tiña lugar unha curiosa conmemoración: levantábase unha pedra que estaba tapando un pozo que, á súa vez, e segundo se cría, comunicaba co Inframundo. Dese xeito, os espíritos dos mortos podían volver por unhas horas á superficie da terra. O 8 de novembro era un deses días. Como se chamaba esa festa e en que outros dous días do ano se celebraba?


III. Hai 2.053 anos, un 26 de novembro, constituíase formalmente unha alianza política entre tres homes que manterían firmemente o poder en Roma durante os seguintes anos, aínda que ó final un acumulou todo o poder. Era a segunda vez na Historia de Roma que se producía un feito semellante. Con que nome coñecemos a esa alianza e quen a formou?

domingo, 28 de octubre de 2012

Un libro: "Peccata minuta"

Baixo o seudónimo de Víctor Amiano (claramente inspirado nos historiadores romanos tardíos Aurelio Víctor e Amiano Marcelino, e baixo o que se agochan tres profesores de Filoloxía Latina), aparece no mercado este libro, que consiste nunha escolma de expresións latinas aínda en uso hoxendía, acompañadas de cadansúa explicación: orixe, significado orixinal, e máis uso (correcto ou incorrecto) actual.

O libro resulta interesante, malia algunha que outra incorrección histórica e unha perspectiva que, ó noso entender, en ocasións resulta errada: é certo que máis dunha expresión latina xa non recolle hoxe exactamente o significado que tiña no idioma orixinal pero, que son as linguas agás un corpo dinámico en constante evolución? O latín, aínda que reducido no seu emprego actual a este tipo de expresións, segue vivo -como os propios autores se encargan de lembrar-, e por iso mesmo, en mans dos falantes, adquire novos matices. Desde logo, iso non é obstáculo para que pasemos un bo anaco coñecendo un pouco máis das nosas orixes lingüísticas. En fin, e como se di no mesmo libro,

NVLLA DIES SINE LINEA

sábado, 6 de octubre de 2012

ROMANAE QVAESTIONES I (MMXII-MMXIII)

Como todos os cursos, desde este blog ofrécese a todos os alumnos de Latín do IES Fontexería a posibilidade de sumar ata 1 punto á nota final do trimestre se respostan correctamente ás tres preguntas que cada mes publicaremos. Todas elas teñen que ver con acontecementos ou celebracións da Antiga Roma das que se cumpre o seu aniversario.
As respostas deben entregarse ó profesor durante o mes en curso; iso quere dicir que non se poderán entregar en novembro as respostas correspondentes ó mes de outubro, por exemplo.

Así que estas son as Romanae Quaestiones para este décimo mes do ano:



I. Cada primeiro día deste mes os romanos celebraban unha festa na honra de certa deusa. Consistía en que certos sacerdotes, consagrados a tres divinidades, acudían nun carro descuberto ó templo da devandita deusa para ofrecerlle un sacrificio, amosando a man dereita tendida cara diante e envolta nun pano branco. De que deusa se trataba, con que nome colectivo eran coñecidos os sacerdotes e a que deuses estaban consagrados?







II. O día 15 cumprirase o 2.082º aniversario do nacemento do considerado maior poeta da Literatura Latina, autor de tres obras fundamentais tamén para a Literatura Universal. Como se chamaba, cales son os títulos das tres obras e cantos anos vivíu este autor?







III. Tamén cada 15 de outubro os romanos celebraban unha festa, que hoxe ó mellor nos parecería un chisco desagradable. Uns carros tirados por catro cabalos disputaban unha carreira no Campo de Marte: o cabalo da dereita do carro vencedor era sacrificado, e a seguir dúas partes do seu corpo eran levadas a un altar para realizar un ritual. Finalmente, tiña lugar unha competición na que a cabeza do cabalo tiña un protagonismo importante. Pois ben: con que nome se coñecía esta festa, que dúas partes do corpo do cabalo eran levadas ó altar, que se facía con elas e que pasaba coa súa cabeza?

Iterum hic!

Pois iso, que de novo estamos aquí.

Este ano case se nos duplica o traballo, pois asumimos tamén a docencia de Grego. Unha honra e unha responsabilidade. De todos xeitos, desde este blog atenderemos só ás materias de Latín de 4º ESO, e 1º & 2º BAC, polo menos de momento.

Durante este curso, máis do mesmo: Romanae Quaestiones, reseñas de libros, webs relacionadas co mundo romano antigo, e algunha que outra actividade que vaiamos imaxinando.


ROMA SEMPER DELECTAT NOS!


jueves, 21 de junio de 2012

Carmen Declinativum (Novissima Versio)

Chegamos ó remate deste curso 2011-2012, e os alumnos de 4º ESO quixeron gravar a súa propia versión do Carmen Declinativum, e tamén cunha pequena coreografía creada por eles mesmos.

Aquí vola deixo, cos meus desexos dunhas fantásticas vacacións.

Vémonos á volta, cos designios favorables dos deuses, no curso 2012-2013

domingo, 3 de junio de 2012

Sesenta millóns de romanos

O autor, Jeffrey Toner, logra nesta obra achegarnos eficazmente á forma de vivir e de pensar da maior parte da poboación do Imperio Romano, constituída por aqueles que pola súa condición social non disfrutaban dunha posición desafogada, senón todo o contrario: mulleres, escravos e homes libres con traballos precarios e demasiado dependentes dos vaivéns da fortuna.


Lendo este libro saberemos como estas persoas facían fronte ós problemas de supervivencia cotiáns, como afectaba iso á súa saúde mental, que tipo de celebracións lles eran propias, que crenzas relixiosas tiñan máis éxito entre elas e, sobre todo, como enfocaban a súa relación co poder establecido.

ROMANAE QVAESTIONES IX (MMXI-MMXII)

Estamos xa case rematando o curso, e a deste mes será a derradeira ocasión para sumar ata 1 punto á nota final do trimestre contestando ás Romanae Quaestiones que aparecen neste blog. O 0,33 correspondente ó mes pasado xa o sumaron Leticia e Ángela (4º ESO), Mª José (1º BAC), e tamén Mariña, Bea, Paula, Maruxa e María (2º BAC).
As preguntas deste mes son estas:

 


I. O 12 de xuño de hai 1.973 anos morría a irmá dun Emperador romano, famoso pola súa tolemia. Foi tanta a súa dor pola perda que promulgou unha lei pola cal estaba prohibido, baixo pena de morte, rir, bañarse ou comer coa familia. Quen era o Emperador e como se chamaba a súa irmá?








II. Hai 2.227 anos, un 22 de xuño, producíuse xunto a un lago unha gran derrota dun exército romano fronte a unha invasión estranxeira. Era o terceiro desastre romano diante deste invasor, e aínda habería un cuarto. Queremos saber o nome do lago, quen eran os invasores, quen mandaba o exército romano e cantos homes nos din as fontes antigas que perdeu na batalla.






III. 325 anos despois da morte da muller mencionada na primeira Quaestio, morreu nunha batalla en terras orientais un Emperador romano, que gobernara pouco máis de dous anos. Pasou á Historia sobre todo por unha reforma relixiosa que só durou o mesmo ca el como Emperador. Quen era este Emperador, de que reforma relixiosa se trataba, e diante de que inimigo atopou a morte?

miércoles, 16 de mayo de 2012

Attendite, alumni Secundi Cursus Baccalaureatus!

Logo de facerdes, hoxe pola mañá, un exame ben doado (aínda vos queixaredes), aquí vos deixo as notas. As columnas da táboa, de esquerda a dereita, conteñen o voso nome (en iniciais, como sempre, para preservar a privacidade), a nota do exame de hoxe, a nota (virtual) do 3º trimestre, e a nota final de curso. Esta última foi calculada a través da media das calificacións dos tres trimestres, con aproximación á cifra seguinte ou anterior, dependendo de se as centésimas son superiores ou inferiores a 0,50.

Para revisar os exames e/ou para aclaracións, quedamos o vindeiro venres.

Que pasedes un bo Día das Letras Galegas, o máis incomprensible dos días non lectivos do curso, ó meu parecer (iso si: a vós permitirádevos descansar e/ou estudiar para os exames que vos quedan).



VTINAM STVDIVM VESTRVM PRAEMIVM MEREATVR!


jueves, 3 de mayo de 2012

ROMANAE QVAESTIONES VIII (MMXI-MMXII)

A maio chegamos, aínda que de momento parece novembro. Disque o tempo frío e atristurado favorece a concentración, así que imos ver que tal se vos dan as quaestiones deste mes. As de abril funcionaron ben para Leticia (4º ESO), Mariña, Bea, Paula, Maruxa e María (todas elas de 2º BAC), que aumentaron xa nun chisco a súa nota final de trimestre: 0,33 no caso de 4º ESO, e 0,5 no de 2º BAC, xa que elas rematan o seu curso neste mes de maio.

Velaí van:

I. O primeiro día do mes de hai 1.604 anos morría o primeiro Emperador Romano de Oriente tras a división definitiva do Imperio. Parece ser que non tiña un carácter forte, e que se deixaba aconsellar en case todo por dous ministros e a súa esposa (cuxo nome significa, en grego, "a que pensa ben"). De que Emperador estamos a falar e como se chamaba a súa muller?






II. Todos os anos, tamén o primeiro de maio, Roma celebraba unha festa na honra de dous deuses, considerados os gardiáns das murallas de Roma. De que deuses falamos?





III. Nos primeiros tempos de Roma, hai 2.507 anos, un 15 de maio, íase consagrar (isto é, inaugurar) un templo dedicado a certo deus que, entre outras cousas, favorece o comercio. Houbo moita polémica porque, en principio, esa honra correspondía ós dous cónsules en exercicio, pero o Senado decidíu encomendar na Asamblea Popular a designación do encargado, e esta elixíu a un plebeio, cousa que molestou moito ós patricios. Deste entón, e dado que co tempo o outeiro no que se atopaba o templo estivo principalmente poboado por plebeios -maioritariamente dedicados a actividades comerciais-, foi esa clase social a que venerou especialmente ó deus. De que deus se trata e en que outeiro estivo o seu templo?

domingo, 22 de abril de 2012

Pompeia

Desde que foi redescuberta, alá polo século XVIII, Pompeia non ten deixado de aportarnos un eito de información sobre a vida dos antigos romanos.
Neste libro, publicado en españa por Aguilar, Alex Butterworth e Ray Laurence achégannos á realidade pompeiana a través dunha interpretación moi viva do xacemento, poñendo nome, apelidos e actividades a moitas persoas que viviron nesa cidade soterrada por unha erupción do Vesubio o 25 de agosto do ano 79 d.C.

lunes, 9 de abril de 2012

ROMANAE QVAESTIONES VII (MMXI-MMXII)

Encaramos xa o trimestre final do curso, e con el un novo trío de oportunidades para que os alumnos de Latín de 4º ESO, 1º BAC e 2º BAC poidan engadir ata 1 punto á súa nota final. Para iso, unha vez máis, cada mes haberá que solucionar uns enigmas que se presentarán neste blog.

Velaí van os correspondentes a este mes de abril, no que, no seu día 21, Roma cumprirá 2.765 anos.

I. A véspera das Nonas de Abril (ou sexa, o cuarto día do mes), os romanos comezaban a celebración dunhas festas na honra de certa deusa. Esta divinidade, de orixe estranxeira e que empezou a ser venerada en Roma a raíz dun conflicto bélico moi perigoso para a cidade, tiña uns sacerdotes que eran coñecidos cun nome que coincidía co xentilicio dos habitantes dun territorio conquistado por un gran xeneral, e que debían ser castrados para servir á deusa. Durante estas festas, a súa imaxe era conducida en procesión polas rúas, e tamén se celebraban banquetes ós que patricios e plebeios se invitaban reciprocamente. Con todas estas pistas, será doado averiguar o nome da deusa, o das festas, e o dos sacerdotes.



II. O día 8 de abril de hai 2.064 anos o máis grande orador romano pronunciou un discurso en defensa dun asasino. O asasinado tiña tamén que ver co orador, xa que aquel fora parte activa, 6 anos antes, nun proceso xudicial que rematou co seu exilio. Queremos o nome do orador, o do defendido, o do asasinado, e tamén o título do discurso.








III. O mesmo día, 8 de abril, pero 94 anos máis tarde, nacía nunha importante cidade do norte de África un individuo que, ós seus 47 anos, chegaría a ser Emperador. Como se chamaba e en que cidade nacíu?

viernes, 23 de marzo de 2012

Nuntiationes ad Secundum Cursum Baccalaureatus: Qualificationes

Tal como hemos quedado, aquí tenéis las calificaciones. Para que no os confundáis, las siglas de la tabla quieren dicir lo siguiente:

N. E. H.: Nota del Examen de Hoy.
N. M. E.: Nota Media de los Exámenes (teniendo en cuenta que el teórico vale un 30%, el práctico un 70%, y los dos en conjunto un 60%).
N. M. J.: Nota Media de los eJercicios (para este trimestre: los Cuestionarios del Aula Virtual correspondientes a las Unidades 5 a 8, el trabajo sobre Golfus de Roma, y los ejercicios sobre los géneros literarios de la Historiografía y la Oratoria). Este apartado tiene un valor del 25% de la nota.
N. A.: Nota de Actitud. Vale un 15%
R. Q.: Romanae Quaestiones (las preguntas mensuales -de respuesta voluntaria- que aparecen en este blog: hasta 1 punto)
N. F. T. D. S. T.: Nota Final del Trimestre Después de Sumar Todo

Espero que haya quedado claro, pero cualquier duda que tengáis podéis plantearla el lunes, cuando revisemos el examen que hemos hecho hoy.


viernes, 2 de marzo de 2012

ROMANAE QVAESTIONES VI (MMXI-MMXII)

Entramos no que durante moitos anos foi o primeiro mes do calendario romano, e deixamos atrás febreiro, que outorgou 0,33 puntos á nota final do trimestre de Mariña, Beatriz, Maruxa e Paula (todas elas de 2º BAC), e 0,22 á de Leticia (4º ESO). Para elas, e para todos os demais alumnos de Latín do IES Fontexería, velaquí unha nova oportunidade:


I. O primeiro día deste mes de hai 2.098 anos, un xeneral romano -que logo foi dictador, fixo moitos cambios na lexislación romana e rematou deixando o poder- saqueaba certa cidade grega, de gran importancia, aínda que xa deixara atrás os seus mellores días. Para rendela tivo que asediala durante varios meses e, logo da súa conquista, entregouna ós seus soldados para que a saqueasen. Quen foi este xeneral e de que cidade se trata?




II. O mesmo día, 1 de marzo, pero de todos os anos, celebrábase en Roma unha curiosa procesión: sacábanse á rúa 12 escudos sagrados, que estaban confiados á custodia dun colexio sacerdotal. Esta festa conmemoraba o agasallo que, en tempos moi antigos, certo deus fixera a certo rei romano. Que nome recibían en latín eses escudos, de que deus e rei estamos a falar, e cal era o nome do colexio de sacerdotes mencionado?




III. Para rematar, 247 anos máis tarde da toma da cidade citada na primeira pregunta, morría en Roma, un 7 de marzo, un Emperador, considerado un dos mellores da Historia de Roma, xa que durante o seus anos de goberno, segundo parece, non mandou executar a ninguén, e foi moi querido polo pobo. De que Emperador se trata, de que morreu, e en que parte de Roma está ubicado o templo que leva o seu nome, compartido co da súa esposa?

miércoles, 8 de febrero de 2012

Roma cotidie

A este libro pásalle o mesmo que á Antiga Roma: non deixa de perder actualidade porque cada vez que nos achegamos a ela atopamos algo que segue a ser moi semellante hoxendía.

Publicado por primeira vez en EE.UU. en 1903, foi reeditado moitas veces, e desde 2010 (non era sen tempo) dispoñemos dunha traducción ó castelán.

Hai moitos libros sobre a vida cotiá dos antigos romanos, e bastantes deles son máis atractivos visualmente que estes, por estaren ilustrados con abundancia e calidade. Pero se o que queremos é atopar unha descrición concisa e clara das actividades diarias dos antigos romanos, este é o libro ó que debemos acudir: a familia, o matrimonio, a educación, a escravitude, a clientela, a casa e o seu mobiliario, a imaxe persoal, as comidas, as diversións, as viaxes, os libros, os medios de vida, os costumes funerarios e a relixión. E remata cun índice temático para poder consultar rapidamente o eido da vida cotiá que queiramos.

Imprescindible

jueves, 2 de febrero de 2012

ROMANAE QVAESTIONES V (MMXI-MMXII)

Pechamos Xaneiro, que é a porta do ano, e pasamos a Febreiro. No mes anterior houbo 5 persoas que conseguiron sumar 0,33 puntos á súa nota final de trimestre. Elas foron Mariña (2º BAC), María (2º BAC), Maruxa (2º BAC), Paula (2º BAC), Bea (2º BAC) e María José (1º BAC). Para elas, e para todos os demais, este mes hai unha nova oportunidade, e para aproveitala hai que respostar correctamente a estas tres QVAESTIONES:

I. O día 4 deste mes, hai 1.801 anos, morría en certa cidade do norte de Britania (que aproximadamente 600 anos máis tarde se convertería en importante centro cultural dun Imperio europeo de curta vixencia) un Emperador romano. Disque no seu leito de morte chamou onda el ós seus dous fillos e herdeiros e deulles o consello de que, á hora de gobernar (debían facelo xuntos), mantivesen contento ó exército e non se coidasen de nada máis. Queremos saber quen era o Emperador, os seus dous fillos, e os nomes antigo e actual da cidade na que morreu.



II. Un 12 de febreiro, 170 anos antes do acontecemento da pregunta anterior, nacía un rapaz. Era fillo dun Emperador e, no mesmo momento da súa chegada ó mundo, foi proclamado herdeiro e, polo tanto, futuro Emperador. Con todo, a súa nai caíu en desgracia e foi condenada a morte. O seu pai, aínda Emperador, volveu casar, desta volta cunha muller que xa tiña un fillo dun matrimonio anterior. Este segundo rapaz foi adoptado, e á morte do seu padrastro herdou o trono. Pouco despois, a súa nai conspirou para asasinar ó seu medio irmán, cousa que conseguíu. Quen eran os dous rapaces, o Emperador e as dúas nais?





III. Cada 23 de febreiro, todos os anos, celebrábanse en Roma unhas festas na honra de certo deus. A celebración consistía en adornar con guirnaldas de flores os marcos ou límites das diferentes propiedades, e tamén en mollalos con sangue dun año ou dun leitón. De que deus se trataba e que se lle pedía con estas ofrendas?

lunes, 30 de enero de 2012

Concurso Odisea 2012

Un ano máis, a Sección Galega da Sociedad Española de Estudios Clásicos (SEEC) convoca o concurso online Odisea. E un ano máis desde o noso Centro participamos, e coa mesma ilusión de sempre.

Este ano inscribíronse estes 10 grupos:

DIVINA CEFALEA: Elena & Iván (2º BAC)
SEGUIDORAS DE SAFO: Mariña (2º BAC) e María José (1º BAC)
MAVRAE PVELLAE: Maruxa & Paula (2º BAC)
ELOQVENTIA SVMMA: María & Isa (2º BAC)
ROMANI PROXIMI: Nuria & Santi (1º BAC)
OS LEXIONARIOS: Manuel & Rubén (1º BAC)
IOHANNES ET GLORIA: Iván & Gloria (1º BAC)
MARE NOSTRVM: Joana & Iria (1º BAC)
PVELLAE RIDENTES: Sara, Lara & Ángela (4º ESO)
CONVERSE: Sheila & Sofía (1º BAC)

O concurso celebrarase entre os vindeiros días 6 e 10 de febreiro na web Odisea 2012.

MINERVA VOBIS PROPITIA SIT!

domingo, 8 de enero de 2012

ROMANAE QVAESTIONES IV (MMXI-MMXII)

Entramos nun novo ano, nada menos que o 2765º da Historia de Roma. Ese cumpreanos terá lugar, como moitos sabedes, o vindeiro 21 de abril. Ata entón (e despois, ata xuño), segue vixente a miña proposta: se contestades correctamente a tres preguntas relacionadas coa vida na Antiga Roma, cada mes poderedes sumar ata 0,33 puntos á vosa nota final do trimestre (o que fai un total de 0,99: 1 punto, redondeando).

Velaquí as Romanae Quaestiones deste mes de xaneiro:


I. Hai 2.056 anos, xustamente nas kalendae de xaneiro (o día 1), entraba en pleno vigor unha reforma que afectou á vida cotiá dos romanos da época, e que segue marcando a actual. Poderíase dicir que, sen ese cambio, os días non terían sido os mesmos desde aquel momento. A disposición legal a que nos referimos debeuse, ademais, á iniciativa de certo político, que morrería asasinado o mesmo ano, dous meses e 14 días despois. A que reforma nos referimos e quen foi o político que a instaurou?




II. Claro que, 5 anos antes, o mesmo político, que naqueles intres exercía máis ben de militar, pronunciou (ou disque o fixo) certa frase ó cruzar un río no norte de Italia. Antes de facelo pensárao ben, xa que atravesalo podía producir (e de feito producíu) un conflicto bélico de gran alcance. Como a estas alturas xa saberás o nome do personaxe, pídoche agora que averigües cal foi a frase que pronunciou (en latín coa súa traducción), ademais do nome do río.



III. 53 anos despois da morte do protagonista das dúas primeiras quaestiones, un descendente seu erixíu un gran altar nun lugar de Roma que os seus habitantes empregaban para practicar exercicios militares e para celebrar as eleccións, e que estaba dedicado ó deus da guerra. Ese altar estaba dedicado a outra divinidade, de características totalmente contrarias á anterior. Esa edificación aínda se conserva hoxe, e está bastante ben conservada. Quen foi o promotor da súa construcción e con que nome se coñece ese altar?


VTINAM HOC ANNO SAPIENTIORES SITIS!